September 21, 2008

SETIEMBRE

You taba n´outros buizos, reconozu que ye difícil tar al tantu de lu qu´asocede al nuesu alredor anque tamién ye la mía culpa. Esti país de nos cada día ta pior, amás nun hai xente que tenga coyones pa pone-yos penriba la mesa. Lu más curiosu ye vere a la xente del PSOE siendu más llïonesista que la propia xente d´UPL...estu...ya u tan?. Lu de Otero nun tien nome, Castresana? un pazguatu...Melchor? nin idea, peru pur Ponfe va la de dious que nun lu veu...Gemma de viax cumi si ficiera daqué, el vicenada de vicenada y Abelín más solu que la una... Ta tou muitu muertu...asperu qu´esti mes fine d´una vuelta.

December 15, 2007

II Día de la llingua

Buenu, dispués de tantu tiempu ensin escribire una pallabra llega´l momentu de facelu. El domingu, oseya mañana, tendrá llugar nel conceyu de Llión el segundu día de la llingua. Seguru que las cousas pueden facese meyor de lu que se faen y esi tien que ser el nuesu oxetivu. You que toi n´esta vindicación dende cuantayá arrecibí el mensax de la cellebración del día de la llingua ayeri pola tarde. Normal nun ye, diga lu que diga la xente. Tampoucu toi contentu col devenir de la llingua, sobrutóu llinguísticamente, porque políticamente ta perfeutu porque va a ser la primer vuelta na hestoria del nuesu país que va incluyise l´ensinu de la llingua nun colexo. Ya falaréi más al respeutu.

September 14, 2007

"José Eulogio Hernández"

Menudu paisanu. La verdá que nun tengu´l placer de conocéilu peru yía un manguán coyonudu. Nun me presta muitu meteme cun xente desconocida peru cuandu tocan tantu los coyones nun queda outra que saltare. Esti presonax escribi cun cierta regularidá na Crónica, que cumu dixi l´outru día dicin exautamente lu mesmu que dicin los afiliáos de basa del PP (LU MESMU). El quéi? quei l´UPL va a desapaecer, que nun tiene idegas, qu´ensin Oteru nun tenéis ná que facere...Fixavos lu que diz d´Oterín:
"Otero ha ganado mucho como político, y ejerce fantásticamente en Pucela de mosca cojonera. Es joven y conoce el paño"
(!!!!) Yía pa partise de risa, peru onde nacíu esti! Dicire qu´Oteru gañóu muitu cumu políticu yía nun enterase de ná. Tinía qu´entrugar haber quién-y fai las cousas purquéi él lu que yía trabayare muitu non. Amás prestaríame entrugar a "José Eulogio" qué llïonesismu fizu nos cabeiros años Oteru ou si verdá creye que la xente puxu-y aillí pa sere "mosca coyonera" ou cuántu-y quier la xente del partíu ou si yía normal que nas últimas elleiciones Oteru pierda 20000 votos (!!!) y nun dimita cumu secretariu ou lu pïor que mete de númberu dous a un xugador de balunmán que sabe de llïonesismu lu mesmu que you de xaponés, ouseya NÁ. Ya pur últimu diz que "yía xoven y conoz el pañu" perdona peru tien 43 años, val! nun yía vieyu peru lleva DOLCE años de procurdor nas cortes y fíxate si conoz el pañu que tá más cerca del PP que d´UPL. Lu sientu peru nun tienes nin idega. La UPL más que nunca necesita RENOVASE.

September 13, 2007

Congresu d´UPL adelantáu pa ñuviembre

Rubinat reconoz qu´hai crisis nel partíu nunas declaraciones feitas al diariu de Llión. Ja! crisis sedrá la que tien él y el sou amigín Oterín. Yía curiosu cumu nas últimas elleiciones pasóu de presidente de la dipu a un conceyal más de San Andrés. Él que fizu tantu pur esta tierrina, qu´escribíu aquél míticu llibru, él que metíu a la súa moza nel partíu, nel conceyu de San Andrés, nuna comisión...agora salta y diz qu´hai crisis dempués de pasase casi tres meses cuna bouca pechada. Claru, esu de nun tener outru trabayu al que dedicase (!) uy! perdón que yía abogáu, entós nun tien problema p´alcontrare un curru buenu, purquéi si yera pur mín maxinavos onde-y unviaba. Y Oterín sigi ensin dimitire purquéi que naide piense a la escontra qu´esti presonax fadrá dalgu enantes de marchase (de xuru) y seguru que su amigín Rubinat tamién. Hai una corriente nomada (cun páxina web y tou) "Llïonesismu y sociedá" y yía un enxendru d´un antiguu secretariu de partíu que cumu nun-y dan bola faï pixadas d´esti xeitu. Que nun s´escaeza naide qu´a esti tipu nun pue velu nin dious. Nun pueu deixar fuera a los nuesos periódicos que cada día tán pïor. La xente del diariu nun se enteran últimamente de ná y los de la crónica son más del PP que´l cura del miu pueblu. La UPL necesita un cambéu inmediatu, cun xente xoven, nueva, cun idegas, cun un llïonesismu auténticu, cun propuestas claras que llegen a la sociedá, cun políticas llïonesistas...Diz la crónica qu´a la UPL se-y finaron las idegas ya que´l PSOE hebía tomáu pur vindicación l´autonomía. Creigu que cuelquier llïonesista tien más idegas que sólu esu. Aiquí queda estu.-

September 11, 2007

Oterín

La nueva qu´apaez na Crónica de Llión falandu de que "Joaquín Otero" seya el númberu tres pa las cortes del estáu paez qu´aclaria un poucu las cousas. "Xuaquinín" lleva muitu tiempu cuna bouca zarrada y agora sabemos purquéi. Nun ye normal que dende´l partíu permitan estu. Dempués de perdere las dous últimas votaciones na executiva y sere´l másimu rïesponsable del desastre elleutoral lu que de verdá tien que facer ye presentare la dimisión inmediata qu´amás el partíu va arrecoyer cun muita allegría. Agora tamién pescanciamos purquéi taba empeciñáu en pautare cul PP nel conceyu de Llión. Si queremos tenere un partíu llïonesista de verdá ye perimportante qu´esti paisanu dimita, nel últimu congresu dixu qu´esti yera´l sou últimu mandatu...¿a qué taba asperandu?¿creye que la direición del partíu permitirá que seya él el númberu tres nun posible pautu?¿purquéi nun se reñueva´l partíu d´una puñetera vuelta?¿qué facía Oterín ayeri en Ponferrada?¿nun sedrá una estratexia xurdía dende´l MASS?

September 07, 2007

Les pites

Les pites, les perres, les vaques...asina yera cumu falaba el miu guelu pur parte´l pái. Pur outra banda la mía mái (yía de Guetses) diz catse pa referise a cai, tsuna pa lluna, tsena pa llena. Hai años tuvi suerte de tare trabayandu nos pueblos de Lluciellu, Chana de Somoza, Busnadiegu, Molinaferreira...sólu cunos nomes ya maxinarás lu que pues alcontrare aillí: tolos paisanos zarran en "u" d´un mou continuu. Si vas pa La Baña escueitarás muita "ñ" (la cual reconozu que prétame muitu): ñueite, ñada, ñieve, ñegru, ñuviella...En Palacios, buf! que voi dicir, si yía pa mín lu más cercanu, peru tampoucu yía lu qu´escueitaba na mía cá. Nel Bierzu onde trabayu pues oyere cualquier cousa anque lu que sí pueu dicire yía que las terminaciones en -ino, -ina son muitu más frecuentes que na ciudá de Llión y llueu la toponimia nun ayuda muitu a los "galegistas" onda pa entamar la mesma pallabra "bierzo" nun yía gallega, tamién Fresneu, Campiello, Camponaraya...Na Carbayeda´n Zamora, los alredores de Llión, Senabria, Arribes...Pudía tare falandu de pallabras, pallabreiros, rexones, comarcas...Nun séi... Lu que quieru dicir yía que dalgunas vueltas alcuéntrume en tierra de naide, peru lu que nun toleru yía que dende Asturias quieran imponere´l nome d´asturianu cuandu tá claru que sólu refiérese a eillos. Años atrás pudía habese aceutáu´l nome d´astur-llïonés peru agora ye mui tarde pa eillu, creigu you.

September 05, 2007

Préstame pensare asina

Préstame asgaya pensar que sólu separánme de cualquier presona nel mundu outras cuatru. Estu ye lu nomáu pur dalgún espertu cumu la tïoría de los seis graos de separación. Préstame muitu pensar que nel universu existe dalgu que faï posible´l futuru y que dalgún mou tamos predestináos. Préstame tamién el feitu de que dalgu unvía siñales pa que podamos decidire´l sigiente pasu. El miu collaciu Miliu y la súa muyer dicin qu´esu son pixadas, que´l destín nun esiste y menos manda siñales y que nesti mundu nun hai casualidá nin causalidá. Pa eillos nun hai nada al azar...anque eillos precisamente nun son el meyor exemplu d´eillu. Coñociénunse´n Pertúal hai tres años. El trabayaba de mélicu y eilla de téunicu. Quien diz que´l destín púsu-yes aillí! purquéi non?. Él pudría habese quedáu´n Llión trabayandu y prefiríu dir p´aillí. La mía desplicación yía que dalgún mou descoñocíu "Daqué" yía´l rïesponsable de que tomemos un camín ou l´outru. Esi preciosu momentu cuandu decides yía perfeutu, cumu cuandu creyes que tienes tola túa vida nel puñu y de sópitu escápasete ensin date cuenta, nesi intre tou camuda cuandu creyías tenelu tou baixu control. De toos moos quién fala asina soi you que soi muitu racional y positivista. Aínda préstame esti razonamientu.